مطر الشوارع . حميد

مطــر الشــــوازع

هبَت نسَام جيتك .. ضوَا لحظاتو البكان
زين اركانو الزمان
فرهد الشوق المضارع
البلد بقت الشوارع
دافرة من كل المواقع
زى مطور هتكت سماها وسيَلت ملت المزارع

لهفة الزول الَجا راجع
من نخيجو تقول مودع
الفرح فى أعين الصابرين دموعو
الهتافات التندد بى عوارضو والتأكد لى رجوعو
والتبدد خوفو .. جوعو
والتجدد بخَة الدم فى عروقو .. وبين ضلوعو
تطرد الهم من جموعو ..
من خطابن لافتات اعلام بشابن
موكب العرسان شموعو .. الأصابع البى ترابن
الأكف الدم خضابن
لا فتات اعلام تهبهب زي صفق
الاناشيد .. يشتهنك فى سبق

المنديل التلوَح والطَرح
البنفسج والبراسيم التراقص فى مرح
العصافير الملونة فى مرايات الفضا المتكابى تالاك قوس قزح


استحمَت غيمة فى بحر الأفق
كان دعاش الغيمة بوقة وكانت الرغوة الشفق
جفَف اطرافو النسيم .. جر بشكيرو الغسق
خت فى كف المساحنة الزمن القديم

قالت الريح العجوز
ما استحت .. قالت يجوز
كالصبا ارجع صبية واسرى بى عطر العروس

ابرى فستانا البياضا .. نية الطيب حنين
بى ندم صادق امين عقبت قالت واتوب
ما أغش الأكسجين بالأعاصير العبوس
إلا شان للظلم ادوس

آه يا عشمى الحزين .. لو ترجَعنى السنين
باركنها نسمتين .. باختن بالا الرزين
آجرنَها فى اللى راح .. وطيبن نزف الجراح
وعمَدنها ريح صلاح .. من طرف شق الصباح
‎..

رحم الله الشاعر حميد بقدر ما قدم لهذا الوطن . و بقدر ما كافح وناضل من أجل ايصال صوت الغبش الغلابة الى اعلى المستويات . شكرا جزيلا أبو منار على المشاركة الجميلة .